പ്രണവം

അന്നും ഇന്നും

അന്ന് ക്ഷേത്രങ്ങളായ ക്ഷേത്രങ്ങൾ മുഴുവനും കയറി ഇറങ്ങുമായിരുന്നു. പ്രത്യേകിച്ച് ഗുരുവായൂർ, ശബരിമല എന്നിവിടങ്ങളിൽ എപ്പോഴോ അത് കുറഞ്ഞു. ഒരു തവണ പ്രദക്ഷിണം വെച്ചാൽ വീണ്ടും കാണണമെന്ന അതിയായ മോഹം തിരക്ക് ഇന്നത്തേക്കാൾ കുറവായിരുന്നതിനാൽ പത്ത് പ്രാവശ്യമെങ്കിലും നടയിൽ ചെന്ന് നിൽക്കുമായിരുന്നു. എന്നിട്ടും സംതൃപ്തി പോരാ

പിന്നെപ്പൊഴോ അതിന് മാറ്റം വന്നു. കൃഷ്ണാ നീ എല്ലാ ഇടത്തും ഉണ്ടല്ലോ പിന്നെന്തിന് ഞാൻ നിന്നെത്തേടി അലഞ്ഞു് ബുദ്ധിമുട്ടണം? നീ എന്റെ ഹൃദയത്തിൽ വന്നിരുന്നാൽ സൗകര്യമായിരുന്നു. മനസ്സിൽ സങ്കല്പിച്ച ചിത്രം ആരോ വരച്ചതാണെങ്കിലും അപ്പോഴും ആ മുഖത്ത് ഒരു കുസൃതിച്ചിരി ഞാൻ കണ്ടു. വീട്ടിലെ പൂജാമുറിയിൽ വിളക്ക് വെച്ച് ആരതി ഉഴിഞ്ഞ് അങ്കത്തിന്റെ സ്വഭാവം മാറ്റി.

പതുക്കെ അതിലും താൽപ്പര്യമില്ലാതായി.കാരണം സദാ സമയത്തും കൃഷ്ണ രൂപം മനസ്സിൽ ! നാരായണ മന്ത്രം നാവിൽ 'പിന്നെ വിളക്ക് കൊളുത്തും കണ്ണടച്ച് ഇരിക്കും കൃഷ്ണ രൂപം തെളിയും മുമ്പത്തേക്കാളും സംതൃപ്തി തോന്നുന്നു. എന്റെ ആവലാതികളും പ്രയാസങ്ങളും ചിന്തയിലൂടെ സമർപ്പിക്കയായി. അപ്പോഴും ആ മുഖത്ത് കുസൃതിച്ചിരി മാത്രം

അവസാനം ആവലാതി പറയലും നിന്നു ' സർവ്വം സമർപ്പയാമി എന്ന മന്ത്രം മാത്രം. അത് ധ്യാനിക്കുമ്പോൾ മാത്രമല്ല -നടക്കുമ്പോഴും ഇരിക്കുമ്പോഴും ഉറങ്ങാൻ കിടക്കുമ്പോഴും ഒക്കെ! പതുക്കെ പ്രാർത്ഥനയിൽ പരിപൂർണ്ണ സംതൃപ്തി

കൃഷ്ണൻ ജീവിച്ചിരുന്നിട്ടില്ല എന്ന വാദം കേൾക്കുമ്പോൾ ആദ്യമൊക്കെ ദേഷ്യം കലശലായി വന്നിരുന്നു. പിന്നെ തോന്നി അവർ പറയുന്നത് ശരിയാണ് എന്ന്. കാരണം കൃഷ്ണൻ ഇരിക്കുന്നത് എന്റെയും എന്നെപ്പോലുള്ളവരുടേയും ഹൃദയത്തിലല്ലേ? പിന്നെ അവരെങ്ങിനെ കൃഷ്ണനെ കാണും? അറിയും?  ഇപ്പോൾ എന്നെ പരിപൂർണ്ണമായും സമർപ്പിച്ചിരിക്കുന്നു. എന്റെ മോഹങ്ങളും ദു:ഖങ്ങളും എല്ലാം സമർപ്പിച്ചിരിക്കുന്നു. മനസ്സ് ശാന്തം ! ദൈനംദിന ജീവിതത്തിൽ ഉത്സാഹം ആവേശം ഭക്ഷണം കഴിക്കുമ്പോൾ മുമ്പെങ്ങും തോന്നാത്ത രുചി. അനുഭവിക്കുന്ന ഓരോന്നിലും കൃഷ്ണ സാന്നിദ്ധ്യം.
കൃഷ്ണാ! ഈ ജുബ്ബയും ബനിയനും എല്ലാം അഴിച്ച് അകത്ത് കയറാൻ പ്രയാസമാണ് നീ എപ്പോഴും എന്റെ ഉള്ളിൽത്തന്നെ ഇരുന്നാൽ മതി. ക്ഷേത്രത്തിന് പുറത്ത് നിന്ന് തൊഴാം എന്താ? സമ്മതമല്ലേ? അപ്പോഴും ആ മുഖത്ത് കുസൃതിച്ചിരി. പിന്നെ വേദിയിലേക്ക് കയറിയാൽ സരസ്വതീ പ്രവാഹം പോലെ. ഈ വിഷയങ്ങളൊക്കെ എന്നിൽ നിന്ന് ഗമിച്ചതാണോ? ആയിരിക്കാം. പക്ഷെ അതൊന്നും പറഞ്ഞത് ഞാനല്ല  എന്റെ ശരീരം ഒരു മാധ്യമം മാത്രം. എല്ലാം ആ കുസൃതി ക്കാരൻ ഒപ്പിച്ച പണിയാണ്. അതെ ! എല്ലാം കൃഷ്ണന്റെ ലീല   നാരായണ!