പ്രണവം

നാരായണീയം -ദശകം25 തിയ്യതി- 22/10/2016
നരസിംഹാവതാരം

സ്തംഭേ ഘട്ടയതോ ഹിരണ്യകശിപോഃ
കർണ്ണൗ സമിചൂർണ്ണയയ-
ന്നാഘുർണ്ണജ്ജഗദണ്ഡ കുണ്ഡകുഹരോ
ഘോരസ്തവാഭൂദ്രവഃ
ശ്രുത്വാ യം കില ദൈത്യരാജഹൃദയേ
പൂർവ്വം കദാപ്യശ്രുതം
കമ്പഃ കശ്ചന സമ്പപാദ;ചലിതോ/-
പ്യംഭോജഭൂർവിഷ്ടരാത്.
               അർത്ഥം
തൂണിന്മൽ പ്രഹരിച്ച ഹിരണ്യകശിപുവിന്റെ കാതുകളെ തവിടുപോടി ആക്കുന്നതും ബ്രഹ്മാണ്ഡമാകുന്ന മഹാപാത്രത്തിന്റെ ഉൾഭാഗമെല്ലാം ഇട്ടു വട്ടം തിരിക്കുന്നതും അതിഭയങ്കരവുമായ ഒരു ശബ്ദം അങ്ങയുടേതായിട്ട് ഉണ്ടായി. മുമ്പൊരിക്കലും കേട്ടിട്ടേ ഇല്ലാത്ത ഈ ശബ്ദം കേട്ടിട്ട് ഹിരണ്യകശിപുവിന്റെ ഉള്ളിൽ എന്തെന്നില്ലാത്ത ഒരു പരിഭ്രമം കലശലായി ആവിർഭവിച്ചു.എന്ന് മാത്രമല്ല ബ്രഹ്മാവ് പോലും തന്റെ ഇരിപ്പിടത്തിൽ നിന്ന് ഒന്നിളകിപ്പോയി.
2

ദൈത്യേ ദിക്ഷു വിസൃഷ്ടചക്ഷുഷി മഹാ-
സംരംഭിണി സ്തംഭതഃ
സംഭൂതം ന മൃഗാത്മകം ന മനുജാകാരം
വപുസ്തേ വിഭോ!
കിം കിം ഭീഷണമേതദദ്ഭുതമിതി
വ്യുദ്ഭ്രാന്തചിത്തേ/സുരേ,
വിസ്ഫുർജ്ജദ്ധവളോഗ്രരോമവികസ-
ദ്വർഷ്മാ സമാജൃംഭഥാഃ.
               അർത്ഥം
വല്ലാതെ ക്രുദ്ധനായിത്തീർന്ന അസുരൻ നാലുപാടും നിരീക്ഷിയ്ക്കവേ അല്ലയോ സർവ്വവ്യാപിൻ, മൃഗ സ്വരൂപമല്ലാത്തതും ,നര സ്വരൂപമല്ലാത്തതുമായ അവിടുത്തെ ശരീരം തുണിന്നുള്ളിൽ നിന്നും പുറത്ത് ചാടി. അപ്പോൾ അസുരൻ ഭയങ്കരവും ആശ്ചര്യകരവുമായ ഇത് എന്താണ് എന്താണ് എന്നിങ്ങനെ ഉള്ളാലെ ത്തന്നെ അമ്പരന്നവനായിത്തീരവേ അവിടുന്ന് എഴുന്നു നിൽക്കുന്ന വെളുത്ത കൂർത്ത രോമങ്ങളാൽ തടി പെരുകുന്ന ഉടലോടു കൂടിയവനായി അങ്ങിനെ വളരുവാൻ തുടങ്ങി.