പ്രണവം

ഭഗവദ് ഗീതാപഠനം 434-ആം ദിവസം അദ്ധ്യായം 18 തിയ്യതി -14/10/2016 ശ്ളോകം 66

സർവ്വധർമ്മാൻ പരിത്യജ്യ മാമേകം ശരണം വ്രജ
അഹം ത്വാ സർവ്വപാപേഭ്യഃ മോക്ഷയിഷ്യാമി മാ ശുചഃ
                    അർത്ഥം
ശാരീരികവും ,മാനസികവും ,ബുദ്ധിപരവുമായ ധർമ്മങ്ങളെയെല്ലാം പരിത്യജിച്ച് പരമാത്മാവും ഏകനുമായ എന്നെത്തന്നെ ശരണം പ്രാപിക്കൂ!ഞാൻ നിന്നെ സർവ്വ പാപങ്ങളിൽ നനിന്നും മോചിപ്പിക്കാം നീ ദുഃഖിക്കണ്ട.

കൃസ്ത്യൻ പള്ളികൾ ,വിദ്യാലയങ്ങൾ എന്നിവയുടെ ചുവരുകളിൽ ഈ വാചകം കാണാം എപ്പോളെങ്കിലും ശ്രദ്ധിക്കുമല്ലോ!
67
ഇദം തേ നാതപസ്കായ നാഭക്തായ കദാചന
ന ചാശുശ്രുഷവേ വാച്യം ന ച മാം യോ/ഭ്യസൂയതി.
                അർത്ഥം
ഈ ഗീതാശാസ്ത്രം ആത്മസംയമനം ശീലിക്കാത്തവന് ഒരിക്കലും നീ ഉപദേശിക്കരുത്.ഭക്തിയില്ലാത്തവനും കേൾക്കാൻ താല്പര്യം ഇല്ലാത്തവനും എന്നെ നിന്ദിക്കുന്നവനും ഉപദേശിക്കരുത്.
68
യ ഇമം പരമം ഗുഹ്യം മദ്ഭക്തേഷ്വഭിധാസ്യതി
ഭക്തിം മയി പരാം കൃത്വാ മാമേവൈഷ്യത്യസംശയഃ.
               അർത്ഥം
പരമരഹസ്യമായ ഈ ശാസ്ത്രം ആരാണോ എന്നിൽ പരമമായ ഭക്തി നിഷ്ഠയോടെ എന്റെ ഭക്തന്മാരിൽ വ്യാഖ്യാനിച്ചു കൊടുക്കുന്നത് അവൻ തീർച്ചയായും എന്നെത്തന്നെ പ്രാപിക്കും.
69
ന ച തസ്മാന്മനുഷ്യേഷു കശ്ചിന്മേ പ്രിയകൃത്തമഃ
ഭവിതാ ന ച മേ തസ്മാത് അന്യഃ പ്രിയതരോ ഭുവി.
            അർത്ഥം
മാത്രമല്ല അവനേക്കാൾ എനിക്ക് അത്യന്തം പ്രിയം ചെയ്യുന്നവനായിട്ട് മനുഷ്യർക്കിടയിൽ ആരും തന്നെയില്ല.എനിക്ക് അവനേക്കാൾ പ്രിയപ്പെട്ട മറ്റൊരാൾ ഭൂമിയിൽ ഉണ്ടാകാനും പോകുന്നില്ല.
70
അദ്ധ്യേഷ്യതേ ച യ ഇമം ധർമ്മ്യം സംവാദമാവയോഃ
ജ്ഞാനയജ്ഞേന തേനാഹം ഇഷ്ടഃ സ്യാമിതി മേ മതിഃ.
           അർത്ഥം
മാത്രവുമല്ല നാം തമ്മിൽ ആദ്ധ്യാത്മിക തത്ത്വത്തെക്കുറിച്ച് ചെയ്ത ഈ സംവാദത്തെ ആർ പഠിക്കുന്നുവോ അവൻ എന്നെ ജ്ഞാനയജ്ഞം കൊണ്ട് ആരാധിക്കുന്നതായി ഞാൻ കണക്കാക്കുന്നു.
       വിശദീകരണം
എന്റെ ഭക്തന്മാർക്ക് നിഷ്ഠയോടെ വ്യാഖ്യാനിച്ച് കൊടുക്കുന്നവൻ എനിക്ക് ഏറ്റവും പ്രിയപ്പെട്ടവനാണ് എന്ന് ഭഗവാൻ പറയുന്നു അത് പോലെ പഠിക്കുന്നവൻ ജ്ഞാനയജ്ഞനം കൊണ്ട് എന്നെ ആരാധിക്കുകയാണ് എന്ന് ഞാൻ കരുതും എന്നും ഭഗവാൻ പറയുന്നു. സത്യത്തിൽ അതി ഭാഗ്യവാന്മാരല്ലേ നമ്മൾ?