പ്രണവം

                   അമ്മ

ആയിരം ചുംബനം നൽകിയെൻ മേനിയിൽ
പാൽക്കുടം വായിൽ ചുരത്തി പിന്നെ
അച്ഛനെ കാണിച്ചിതച്ഛനെന്നോതി
അച്ഛന്റെ കയ്യിൽ കൊടുത്തു പിന്നെ
അച്ഛനും തന്നുമ്മ പൊട്ടിച്ചിരിച്ചു ഞാൻ
കുറ്റി രോമത്തിനാലിക്കിളിയാൽ
അച്ഛന്റെ കീശയിൽ കയ്യിട്ടു ഞാനന്ന്
പേന വലിച്ചു കടിച്ചു നോക്കി
പേന തൻ കൂർപ്പെന്റെ മോണയിൽ തട്ടി - ഞാൻ
ശ്വാസം വിടാതെ കരഞ്ഞുവത്രേ!
ഓടിയണഞ്ഞെന്നെ വീണ്ടും എടുത്തമ്മ
നെറ്റിയിൽ ഉമ്മയാൽ പൊട്ടു തൊട്ടു
കാറ്റിൽ പറക്കുന്ന കേശം തടവി യെൻ
കാതിൽ പറഞ്ഞിതു വെട്ടിക്കണം
ആണ്ടൊന്നു മുട്ടാതെ വെട്ടുവാൻ പാടില്ല
തത്വം പറഞ്ഞത്രേ മുത്തിയമ്മ
തെന്നിളം കാററിനാൽ ആടി ഉലഞ്ഞെന്റെ
കേശം തടവിനാൻ വീണ്ടുമമ്മ
ആയിരം ചുംബനം നൽകിയെൻ മേനിയിൽ
പാൽക്കുടം വായിൽ ചുരത്തി പിന്നെ
       
              തുവ്വൂർ കൃഷ്ണകുമാർ '