പ്രണവം

വിവേകചൂഡാമണി ശ്ളോകം 77 തിയ്യതി 25/6/2016

യ ഏഷു മൂഢാ വിഷയേഷു ബദ്ധാ
രാഗോരുപാശേന സുദുർദമേന
ആയാന്തി നിര്യാന്ത്യധ ഊർധ്വമുച്ചൈഃ
സ്വകർമ്മദൂതേന ജവേന നീതാഃ
         അർത്ഥം
ഛേദിക്കാൻ വളരെ പ്രയാസമുള്ള രാഗമാകുന്ന ദൃഢമായ കയറിനാൽ ഈവിഷയങ്ങളിൽ ബന്ധിക്കപ്പെട്ട അവിവേകികൾ തങ്ങളുടെ കർമ്മങ്ങളാകുന്ന ദൂതനാൽ വേഗത്തിൽ നയിക്കപ്പെട്ട് മേലെ സ്വർഗ്ഗത്തിലേക്കും കീഴെ നരകത്തിലേക്കും പോകയും വീണ്ടും ഈലോകത്തിലേക്ക് വരികയും ചെയ്യുന്നു
        വിശദീകരണം
ഇവിടെ പറയുമ്പോൾ അത് കുറ്റപ്പെടുത്തൽ ആണെന്ന് കരുതരുത് അവിവേകികൾ എന്നാൽ ആത്മജ്ഞാനം ഇല്ലാത്തവർ എന്നാണർത്ഥം - ആഗ്രഹങ്ങളാകുന്ന ബലമുള്ള കയറി നാൽ നമ്മൾ ബന്ധിക്കപ്പെട്ടിരിക്കുന്നു അതിനെ മുറിക്കുവാൻ നാം അശക്തരാണ് അതിനാൽ ചില നല്ല കർമ്മങ്ങളാൽ സ്വർഗ്ഗത്തിലേക്കും ചില മോശ കർമ്മങ്ങളാൽ നരകത്തിലേക്കും പോയി അവിടുത്തെ അവസ്ഥകൾ അനുഭവിച്ച് വീണ്ടും ഭൂമിയിൽ വന്നു പിറക്കുന്നു
78
ശബ്ദാദിഭിഃ പഞ്ചഭിരേവ പഞ്ച
പഞ്ചത്വമാപുഃ സ്വഗുണേന ബദ്ധാഃ
കുരങ്ഗമാതങ്ഗപതങ്ഗമീന-
ഭൃംഗാ നരഃ പഞ്ചഭിരഞ്ചിതഃ കിം?
         അർത്ഥം
മാൻ, ആന, ഈയൽ, മീൻ, വണ്ട്  എന്നിവ അഞ്ചും ശബ്ദാദി വിഷയങ്ങളിൽ അവരവരുടെ സ്വഭാവത്താൽ ബന്ധിക്കപ്പെട്ട് മരണമടയുന്നു ഈ അഞ്ചു ഗുണങ്ങളിലും ആസക്തനായ മനുഷ്യന്റെ കഥ എന്ത് പറയാൻ
            വിശദീകരണം
മനോഹരമായ ശബ്ദം ആസ്വദിച്ച് മാൻ, ഗന്ധം അതുവഴി സ്പർശനം ആസ്വദിച്ച്ആന, വെളിച്ചം കണ്ട് ഭ്രമിച്ച് ഈയാം പാറ്റ,രസംആ സ്വദിച്ച് മീൻ, ഗന്ധം ആസ്വദിച്ച് വണ്ട് അപകടത്തിൽ പെടുന്നു അപ്പോൾ ഇതെല്ലാം ആസ്വദിക്കാൻ കഴിയുന്ന മനുഷ്യന്റെ കഥ പറയാനുണ്ടോ!
79
ദോഷേണ തീവ്രോ വിഷയഃ കൃഷ്ണസർപ്പവിഷാദപി
വിഷം നിഹന്തി ഭോക്താരം ദ്രഷ്ടാരം ചക്ഷുഷാപ്യയം
           അർത്ഥം
കരീമൂർഖൻ പാമ്പിന്റെ വിഷത്തേക്കാൾ കടുത്ത ദോഷം ചെയ്യുന്നതാണ് വിഷയം വിഷം തിന്നുന്നവനെ കൊല്ലുന്നു വിഷയമോ കാണുന്നവനേപ്പോലും കൊല്ലുന്നു
           വിശദീകരണം
പാമ്പ് കടിച്ചാൽ കടിയേറ്റ വനേ മരിക്കുന്നുള്ളു എന്നാൽ ഒരാൾ പരസ്ത്രീകളുമായി ബന്ധപ്പെടുന്നു, മദ്യപിക്കുന്നു 'കൈക്കൂലി വാങ്ങി സുഖിക്കുന്നു എന്നൊക്കെ കേൾക്കുമ്പോൾ എനിക്കും അങ്ങിനെ ആയാലെന്ത്? എന്ന് ചിന്തിക്കുകയും അത് വഴി സഞ്ചരിക്കുകയും നാശത്തെ നേരിടുകയും ചെയ്യുന്നു അതാണ് പാമ്പിന്റെ വിഷം അത് കടിക്കുന്നവനെ മാത്രമേ ബാധിക്കുന്നുള്ളു എന്നാൽ വിഷയം കാണുന്നവനെ പ്പോലും നശിപ്പിക്കുന്നു എന്ന് പറഞ്ഞത്